ඒමන්ති මාරඹේ
මෙරට නිදහස් වෙළෙඳ කලාපය තුළ සේවය කරන සංක්රමණික සේවකයන්ගෙන් සියයට 40 ක් මන්දපෝෂණ තත්ත්වයක් මත නියමිත බරට වඩා අඩු බරකින් යුතු වන බව සංක්රමණිකයන් පිළිබඳ අන්තර්ජාතික සංවිධානයේ ජ්යෙෂ්ඨ සම්බන්ධීකාරිකා වෛද්ය ශාරිකා පීරිස් මහත්මිය පැවසුවාය.
මෙම පිරිසෙන් බහුතරය එනම් සියයට 73 ක්ම කාන්තාවන් වන බව කී ඇය නිදහස් වෙළෙඳ කලාපයේ සේවය කරන එක් සංක්රමණික සේවකයකුගේ මාසික ආහාර හා සෞඛ්ය වියදම පිළිවෙලින් රුපියල් 3147 ක් හා රුපියල් 387 ක් වන බව අවධාරණය කළාය.
නිදහස් වෙළෙඳ කලාපයට අයත් අපනයන සැකසුම් කලාප 4 ක (කටුනායක, බියගම, කොග්ගල හා සීතාවක) සේවය කරන සංක්රමණික සේවකයන් ආශ්රයෙන් සිදුකරන ලද සමීක්ෂණයකදී මෙම කරුණු අනාවරණය වී තිබේ.
නිදහස් වෙළෙඳ කලාපයේ සේවකයන්ගෙන් සියයට 25.3 ක්ම කුමන ආකාරයක හෝ අනතුරක අවදානමෙන් සේවය කරන අතරතුර එවැනි අනතුරුවලට ලක්වන බවත් එම සේවකයන්ගේ කායික ආබාධවලට වැඩි වශයෙන් (57.1%) හේතු වනුයේ අධික වැඩ රාජකාරි කටයුතු එක දිගට සිදුකිරීම බවත් මෙම සමීක්ෂණයේදී අනාවරණය වී තිබේ. හටගන්නා කායික ආබාධවලින් සියයට 16 කට හේතු වී ඇත්තේ නින්ද ආශ්රිත ප්රශ්නයි.
සංක්රමණිකයන් පිළිබඳ අන්තර්ජාතික දිනය සම්බන්ධයෙන් කරුණු දැක්වීම සඳහා 19 දා කොළඹ සෞඛ්ය අධ්යාපන කාර්යාංශයේ පැවැති මාධ්ය සම්මන්ත්රණයේදී මෙම කරුණු අනාවරණය විය. මෙහිදී සංක්රමණිකයන්ගේ සෞඛ්ය සම්බන්ධයෙන් සෞඛ්ය අමාත්යාංශය විසින් නිර්මාණය කර ඇති නිල වෙබ් අඩවිය විවෘත කිරීම ද සිදුවිය.
මෙම සම්මන්ත්රණය අමතා සෞඛ්ය අමාත්යාංශයේ ලේකම් වෛද්ය රවීන්ද්ර රුබේරු, සංක්රමණිකයන් පිළිබඳ අන්තර්ජාතික සංවිධානයේ ශ්රී ලංකාවේ සිටින නේවාසික නියෝජිත රිචඩ් ඩැන්සිගර්, සෞඛ්ය අමාත්යාංශයේ සංක්රමණික සෞඛ්ය සංවර්ධනය පිළිබඳ ජාතික මධ්යස්ථානයේ විශේෂඥ වෛද්ය සුසී පෙරේරා යන මහත්ම මහත්මීහු ද කතා කළහ.
No comments:
Post a Comment